નાણાકીય

ટેકનોલોજી અને સેમિકન્ડક્ટર સેક્ટરમાં મજબૂત સેન્ટિમેન્ટને કારણે નાસ્ડેક અને એસ એન્ડ પી 500 ઇન્ડેક્સમાં સતત સુધારો જોવા મળી રહ્યો છે. બ્રોડકોમના સીઇઓ દ્વારા એઆઈ કમ્પ્યુટિંગ ક્ષમતા વધારવા માટે બેંકોના કન્સોર્ટિયમ સાથે 63 અબજ ડોલરના ધિરાણ માળખાની જાહેરાત બાદ ચિપમેકર શેરોમાં આકર્ષક તેજી જોવા મળી છે. વધુમાં, માઇક્રોસોફ્ટ અને આલ્ફાબેટ જેવી અગ્રણી કંપનીઓના ત્રિમાસિક પરિણામો પર બજારની નજર ટકેલી છે.

અમેરિકા, ઇઝરાયેલ અને ઇરાન વચ્ચે ચાલી રહેલા યુદ્ધનો અંત લાવવા માટે ઇરાનના ઉચ્ચ નેતૃત્વ દ્વારા વિવિધ વિકલ્પો પર વિચારણા કરવામાં આવી રહી હોવાના અહેવાલો બાદ ક્રૂડ ઓઇલના ભાવમાં ઘટાડો નોંધાયો છે. વેસ્ટ ટેક્સાસ ઇન્ટરમીડિએટ (WTI) ક્રૂડ ફ્યુચર્સ 1.83% ઘટીને બેરલ દીઠ 99.90 ડોલરની સપાટીએ બંધ આવ્યું હતું. જ્યારે બ્રેન્ટ ક્રૂડ ફ્યુચર્સ પણ 1.67% ના ઘટાડા સાથે બેરલ દીઠ 113.88 ડોલર પર આવી ગયું હતું.

વૈશ્વિક બજારોમાં વધતી જતી મોંઘવારી અને આર્થિક ચિંતાઓને કારણે રોકાણકારો ફરી એકવાર સુરક્ષિત રોકાણ તરફ વળ્યા છે. કોમોડિટી માર્કેટમાં સોનાના ભાવમાં 0.68% નો વધારો જોવા મળ્યો હતો, જેના કારણે સોનું પ્રતિ ઔંસ 4,035 ડોલરની સપાટીએ પહોંચ્યું છે. આ સાથે જ ચાંદીના વાયદા પણ સામાન્ય સુધારા સાથે 54.14 ડોલર પર ટ્રેડ થઈ રહ્યા હતા.